Skip to main content
Department of Taxation and Finance

Piblikasyon 130-F, Odit taks Eta New York – Dwa Ou ak Responsablite Ou

Depatman Taksasyon ak Finans (Department of Taxation and Finance) fè odit pou l verifye kantite taks kontribyab yo te peye a kòrèk. Pandan odit la, ou ka oblije bay oditè a nenpòt dosye ki nesesè pou li verifye enfòmasyon ou te bay nan deklarasyon taks ou an. Selon kalite deklarasyon li ap fè odit pou li a, li ka egzamine revni ou, resi, depans, kredi, ak lòt dosye biznis ou.

Professional audit standards (Estanda odit pwofesyonèl)

Odit yo fèt selon estanda odit pwofesyonèl, ak yon oditè Depatman Taks (Tax Department) ki abitye avèk pwosedi kontablite ak teknik odit yo jeneralman aksepte yo.

Pou evite nenpòt konfli enterè, oditè a pa ka gen okenn relasyon pèsonèl avèk kontribyab la, li pa ka ni fanmi ni anplwaye kontribyab la (nan ka yon odit biznis). Mete sou sa, oditè a pa dwe genyen okenn enterè pèsonèl oswa finansye nan yon biznis l ap fè odit pou li.

Pandan tout tan li ap fè yon odit, ou gen dwa pou li trete ou yon fason jis, ak respè, epi pwofesyonèl. Si nenpòt ki lè pandan yon odit ou santi li te vyole estanda sa yo oswa nenpòt nan dwa ou yo, ou dwe kontakte sipèvizè oditè a san pèdi tan.

Pou w denonse yon anplwaye ki fè fwod, rele Biwo Zafè Entèn (Office of Internal Affairs) nan 518-451-1566 oswa ekri nan:

NYS TAX DEPARTMENT
OFFICE OF INTERNAL AFFAIRS
W A HARRIMAN CAMPUS
ALBANY NY 12227-0811

Si ou p ap itilize Lapòs Ameriken, gade Piblikasyon 55, Sèvis Livrezon Prive Deziyen (Designated Private Delivery Services).

Statute of limitations (Lwa sou Delè)

Lwa sou Taks Eta New York jeneralman mete yon lwa sou delè twa lane sou odit taks yo. Depi delè sa a pase, Depatman Taks pa ka fè odit san konsantman alekri ou. Men, lwa sou delè a pa valab pou okenn peryòd ou pa t fè deklarasyon taks, ou pa t fè chanjman federal, oswa ou te fè yon fo deklarasyon taks sou revni pou evite peye taks. Pou w jwenn plis enfòmasyon, ale sou sitwèb nou an (gade ribrik Èske ou bezwen èd? (Need help?)).

Privacy and confidentiality (Pwoteksyon Vi Prive ak Konfidansyalite)

Ou gen dwa pou w konnen rezon ki fè n ap mande sèten enfòmasyon, ki jan nou pral sèvi ak enfòmasyon yo, ak konsekans ki genyen si ou pa soumèt enfòmasyon yo. Lwa sou Taks entèdi nou pataje enfòmasyon nou jwenn nan yon deklarasyon taks oswa pandan yon odit, avèk yon moun ki pa gen otorizasyon. Men, Lwa sou Taks la pa pèmèt nou pataje enfòmasyon taks ou yo avèk Sèvis Revni Entèn (Internal Revenue Service, IRS) ak lòt ajans gouvènman, nan nòm sekrè ak resipwosite ki defini.

Pou w jwenn plis enfòmasyon, gade Privacy and confidentiality (Pwoteksyon Vi Prive ak Konfidansyalite).

Representation (Reprezantasyon)

Ou ka fè yon moun reprezante ou nenpòt ki lè pandan yon odit, oswa sispann yon reyinyon oswa yon entèvyou pou fè yon moun reprezante ou. Nenpòt moun ki reprezante ou dwe gen otorizasyon alekri (Fòm POA-1, Manda (Form POA-1, Power of Attorney) ki apwopriye ou ba li pou l aji nan non ou.

Ansyen anplwaye Depatman Taks yo pa kapab reprezante kontribyab yo devan Depatman an pandan yon peryòd de (2) lane apre yo fin kite Depatman an. (Ak kèk restriksyon, ansyen anplwaye yo kapab reprezante kontribyab yo devan Divizyon Kontestasyon Taks (Division of Tax Appeals) endepandan an pandan peryòd de (2) lane sa a.) Yo entèdi ansyen anplwaye yo pou yo pa janm reprezante kontribyab nan zafè kote yo te patisipe dirèkteman pandan peryòd yo t ap travay pou Depatman an.

Audio recording (Anrejistreman odyo)

Ou ka fè yon anrejistreman odyo nenpòt ki entèvyou fas-a-fas depi ou avèti nou alavans. Ou dwe fè anrejistreman an ak pwòp kòb nan pòch ou epi ak pwòp ekipman ou. Nou menm tou nou gen dwa pou nou anrejistre nenpòt entèvyou fas-a-fas depi ou avèti nou alavans.

The field audit (Odit sou teren an)

Jeneralman, nou pwograme odit sou teren yo omwen 15 jou davans pou ba ou tan pou sanble dosye yo mande yo. Lè yo chwazi w pou yon odit sou teren, yon oditè ap kontakte ou pou pran yon premye randevou. Ou pral resevwa yon lèt ki konfime randevou a epi ki dekri liv ak dosye ou dwe rann disponib yo. Pou yon odit biznis, pifò randevou yo ap dewoule nan biznis ou an.

Si ou bezwen plis pase 15 jou pou sanble dosye ki nesesè yo, jeneralman ou kapab mande yon pwolongasyon pou jiska 30 jou; pou reta ki dire plis pase 30 jou, ou dwe fè yon demann alekri ki eksplike rezon ki fè ou fè demann lan.

Opening conference (Kòmansman konferans lan)

Nan premye rankont ou a (ki rele kòmansman konferans lan (opening conference)), oditè a pral

  • eksplike apwòch ak pwosedi odit la,
  • dekri pwosesis odit la, epi
  • dekri dwa ou genyen pou konteste ak pwosedi kontestasyon yo.

Itilize rankont sa a pou poze nenpòt kesyon ou genyen sou dwa ak responsablite ou yo ou pandan odit la.

Audit methods (Metòd odit yo)

Genyen plizyè metòd diferan pou fè odit yo: Nou ka fè:

  • yon odit detaye,
  • yon odit ki gen ladan l metòd peryòd tès, oswa,
  • yon odit ki gen yon metòd echantiyon estatistik.

Metòd yon oditè chwazi ap depannde plizyè faktè, tankou kalite taks la, presizyon ak disponiblite dosye yo, epi gwosè ak konpleksite yon biznis.

Mete sou sa, nou ka fè odit la pi gran epi fè li tankou yon odit plizyè taks.

Si premye rezilta odit la revele gen yon gwo enpak sou fason ou deklare yon lòt taks, nou ka refere rezilta yo bay yon lòt espesyalite taks nenpòt ki lè pandan pwosesis odit la. Nou ka itilize ajisteman odit nan yon (1) espesyalite taks kòm baz pou nou rekalkile taks nan yon lòt, selon enfòmasyon yo ak sikonstans ka a.

Audit period and duration (Peryòd ak dire odit la)

Yon odit jeneralman kouvri yon peryòd twa (3) lane, epi li ka pran plizyè jou oswa jiska yon (1) ane oswa plis pou li fini. Dire a depannde konpleksite deklarasyon yo ap fè odit sou li a, ak fason dosye ou yo disponib, konplè, ak egzat.

Audit findings (Rezilta odit la)

Si nou detèmine pa gen okenn chanjman ki nesesè, nou pral voye  yon lèt ba ou ki di nou pa pral fè okenn chanjman nan deklarasyon ou an, demann pou ranbousman ou an, oswa dokiman ou yo.

Si gen chanjman, oditè a ap prezante kopi papye travay odit yo epi l ap eksplike rezilta odit yo, ansanm avèk metòd ak pwosedi odit li te itilize nan odit la nan langaj ki senp epi ki pa teknik. Rezilta yo ka genyen ladan yo:

  • chanjman yo rekòmande nan fason pou kenbe dosye ou pou korije erè kontabilite nou te jwenn pandan odit la,
  • yon eksplikasyon entèpretasyon apwopriye Lwa sou Taks nan domèn kote yo te fè erè yo,
  • yon avi pou taks an plis ou dwe yo, oswa
  • yon avi ki di nou dwe w yon ranbousman.

Nou pral ba ou yon kantite tan rezonab pou egzamine rezilta odit yo. Apresa, oditè a pral analize nenpòt lòt enfòmasyon ou soumèt, epi, si sa apwopriye, revize epi soumèt papye travay yo ankò.

Si rezilta odit la di fòk yo ranbouse w, oditè a ap ba ou nenpòt èd ou bezwen.

If you agree (Si ou dakò)

Si ou dakò avèk rezilta odit yo, n ap mande ou siyen pwopozisyon an, epi remèt li bay oditè a ak tout peman (payment) an.

Si ou dwe lajan men ou pa ka peye tout lajan an touswit, ou ka elijib pou yon antant pou peye pa vèsman (installment payment agreement), sa ki pèmèt ou espase peman ou yo pandan yon tan. Men, enterè (epi petèt sanksyon) ap kontinye ogmante sou rès lajan ou poko peye a.

If you disagree (Si ou pa dakò)

Si ou pa dakò avèk rezilta odit yo, di ou pa dakò sou pwopozisyon an epi remèt li bay oditè a. Ou ka mande plis konferans avèk sipèvizè oditè a si sa nesesè.

Si ou toujou pa dakò avèk rezilta odit la, n ap voye yon Avi Konsènan Detèminasyon (Notice of Determination) oswa Avi Konsènan Ensifizans (Notice of Deficiency) pou taks ou dwe yo. Nan pwen sa a, ou ka konteste rezilta odit yo swa nan Biwo Sèvis Konsilyasyon ak Medyasyon (Bureau of Conciliation and Mediation Services) swa nan Divizyon Kontestasyon Taks la. An jeneral, fòk ou depoze kontestasyon w lan nan espas 90 jou apre dat yo te fin pibliye avi a. (Gade ribrik Dwa ou genyen pou w konteste yon mezi Depatman Taks pran, anba a). Al gade nan avi ou te resevwa a pou w konnen delè ki aplikab la. Ou dwe soumèt yon kontestasyon alekri menm si ou te deja ekri Depatman an pou w konteste pozisyon li te pran nan pwopozisyon an.

Penalties and interest (Sanksyon ak enterè)

Twa (3) pi gwo rezon moun jwenn sanksyon se:

  • lè yo deklare taks anreta,
  • lè yo pa peye taks a lè, ak
  • lè yo fè peman estimasyon taks ki pa sifizan.

Ou kapab evite Sanksyon ak enterè (Penalties and interest) lè w deklare taks ou epi peye montan taks ki kòrèk la a tan.

Sanksyon pou moun ki deklare taks anreta ak moun ki pa peye taks yo baze sou montan taks ki anreta a. Men, genyen tout kalite sanksyon pou moun ki deklare taks anreta menm si ou pa dwe taks.

Kit ou dakò kit ou pa dakò avèk taks la, enterè a, oswa sanksyon yo, enterè ak sanksyon yo ap kontinye ajoute sou montan ou dwe a jiskaske ou peye nou tout. Pou w jwenn plis enfòmasyon, gade Sanksyon ak enterè (Penalties and interest).

Claims for refund (Reklamasyon pou ranbousman)

Anpil kontribyab panse lè yo jwenn ranbousman taks, se paske yo te peye plis taks pase yo sa yo te dwe. Men, apre ou fin depoze yon premye deklarasyon, ou ka remake ou te bliye yon kredi, dediksyon, oswa egzanpsyon. Pou sèten kalite taks, ou dwe depoze yon deklarasyon ki modifye pou reklame ranbousman yo. Pou lòt kalite taks yo, ou dwe soumèt yon reklamasyon pou ranbousman ansanm avèk dokiman ki pwouve peman taks oswa peman anplis ki gen erè a. Pou w jwenn plis enfòmasyon, gade ribrik Èske ou bezwen èd?

Si nou ajiste oswa refize ranbousman ou mande a, n ap voye yon avi alekri ba ou pou eksplike nenpòt dwa ou genyen pou w konteste. Si ou pa dakò avèk ajisteman an oswa anilasyon yon ranbousman, ou ka soumèt plis enfòmasyon pou pwouve pozisyon ou. Si ou toujou pa dakò apre verifikasyon nou an, ou ka konteste nan Biwo Sèvis Konsilyasyon ak Medyasyon (Bureau of Conciliation and Mediation Services) oswa Divizyon Kontestasyon Taks la. (Gade ribrik Dwa ou genyen pou w konteste yon mezi Depatman Taks pran, anba a.) Men, sonje si ou te resevwa yon dokiman ki presize nan ki delè pou w konteste detèminasyon nou an nan Biwo Sèvis Konsilyasyon ak Medyasyon an oswa nan Divizyon Kontestasyon Taks la, lefèkte ou resevwa lèt oswa ou an kontak avèk nou pa pwolonje delè ou genyen pou w mande yon verifikasyon konsa.

Pou w jwenn plis enfòmasyon, gade Claims for refund (Reklamasyon pou ranbousman).

Protest a department notice (Dwa ou genyen pou w konteste yon mezi Depatman Taks pran)

Si ou pa dakò avèk yon mezi nou te pran, ou ka konteste lè w ranpli Fòm CMS-1 (Form CMS-1), Demann pou Konferans pou Konsilyasyon (Request for Conciliation Conference), pou yon konferans nan Biwo Sèvis Konsilyasyon ak Medyasyon an oswa lè w ranpli Fòm TA-100 (Form TA-100), Petisyon (Petition), pou yon odyans kontestasyon taks nan Divizyon Kontestasyon Taks la.

Ou dwe depoze demann lan oswa petisyon an nan yon sèten delè apre dat Depatman Taks te voye ba ou avi konsènan mezi li pran an pa lapòs. Al gade nan avi ou te resevwa a pou w konnen delè ki aplikab la. Se Lwa sou Taks ki te etabli delè sa yo epi nou pa ka pwolonje yo. Si w ap voye demann oswa petisyon ou an pa lapòs, nou rekòmande ou itilize kourye sètifye (certified) oswa anrejistre (registered).

Ou ka prezante pou tèt ou oswa ou ka fè yon reprezantan otorize prezante dosye ou an pou yo ka egzamine l. Yon reprezantan otorize dwe gen yon manda nan men li ou ba li (Fòm POA-1 (Form POA-1)).

Ou pa gen okenn dwa pou benefisye odyans sou peman alavans si ou dwe taks, enterè, oswa sanksyon akoz:

  • erè matematik oswa erè tape ki fèt nan deklarasyon ou an,
  • chanjman IRS te fè nan deklarasyon federal ou a, oswa
  • ou pa te peye tout oswa yon pati nan taks ou dwe a ki parèt nan deklarasyon ou an.

Conciliation conference (Konferans konsilyasyon)

Yon konferans konsilyasyon se yon mwayen ki pi rapid epi ki pi bon mache pou rezoud pwoblèm san yon odyans. Konferans lan fèt yon fason enfòmèl ak yon medyatè ki pral egzamine tout prèv ki prezante pou detèmine yon rezilta san paspouki. Apre konferans la, medyatè a pral voye yon rezolisyon li pwopoze sou fòm yon konsantman. Ou oblije respekte sa ki nan lòd konsilyasyon an amwenske ou depoze yon petisyon, Fòm TA-100 (Form TA-100), nan Divizyon Kontestasyon Taks la. Al gade nan enfòmasyon ou te resevwa avèk lòd la pou w konnen delè ki aplikab la.

Konferans konsilyasyon yo pa disponib pou distribitè, transpòtè k ap enpòte, operatè tèminal, oswa biznis petwòl kote pwoblèm nan se yon ogmantasyon nan montan yon kosyon oswa lòt garanti. Se sèlman Divizyon Kontestasyon Taks la ki jere pwoblèm sa yo.

Pou w jwenn plis enfòmasyon, gade Conciliation conference (Konferans konsilyasyon).

Tax appeals hearing (Odyans kontestasyon taks)

Pou mande yon odyans kontestasyon taks, ou dwe depoze Fòm TA-100 (Form TA-100) nan Divizyon Kontestasyon Taks la. Fòk ou di alekri mezi espesifik Depatman Taks pran w ap konteste yo.

Odyans lan se yon pwosedi advèsè devan yon jij dwa administratif san patipri. Yon estenograf ap fè pwosè vèbal odyans lan. Apre odyans la, jij dwa administratif la pral bay yon detèminasyon ki pral finalman deside sou zafè w ap konteste a amwenske ou menm oswa Depatman Taks mande pou Tribinal Kontestasyon Taks la egzamine desizyon an. Si sa rive, Tribinal la pral:

  • egzamine dosye odyans lan ak nenpòt lòt agiman ki te fèt aloral oswa alekri, epi
  • bay yon desizyon ki afime, anile, oswa modifye detèminasyon jij dwa administratif la, oswa
  • refere zafè a bay jij dwa administratif la ankò pou plis odyans.

Yon demann pou yon fòm petisyon ak règ yo pa konsidere kòm ou depoze yon petisyon pou yon odyans pou delè yo, epi li pa pwolonje delè pou depoze yon petisyon.

Evalyasyon tribinal: Si ou pa dakò avèk desizyon Tribinal Kontestasyon Taks la, ou ka mande yon evalyasyon tribinal. Gen delè pou w fè kontestasyon pou yon evalyasyon tribinal (jeneralman, nan kat espas (4) mwa apre Tribinal Kontestasyon Taks la te ba ou avi sou desizyon an, ak kourye sètifye oswa sèvis pèsonèl). Pou kèk taks, ou dwe peye taks, enterè, ak sanksyon, oswa bay yon kosyon pou montan sa a, plis depans tribinal, lè ou depoze yon kontestasyon pou evalyasyon tribinal la.

Opsyon ti reklamasyon: Si montan w ap konteste a nan limit kantite dola yo etabli nan Règ Pratik ak Pwosedi Tribinal Kontestasyon Taks la, ou ka chwazi pou w fè odyans ou an nan Inite Ti Reklamasyon nan Divizyon Kontestasyon Taks la. Yon ajan san patipri ap dirije odyans pou ti reklamasyon an. Desizyon ajan k ap dirije odyans la ap definitif epi pa gen okenn lòt inite nan Divizyon Kontestasyon Taks, Tribinal Kontestasyon Taks la, oswa okenn lòt tribinal la ki pral evalye li ankò.

Fòm TA-100 (Form TA-100), ak Règ Pratik ak Pwosedi Tribinal Kontestasyon Taks la disponib sou sitwèb Divizyon Kontestasyon Taks la ki se www.dta.ny.gov. Epitou, ou kapab mande yo lè w rele nan 518-266-3000, oswa ekri nan: Division of Tax Appeals, Agency Building 1, Empire State Plaza, Albany NY 12223.

Need help? (Èske ou bezwen èd?)

Pou w jwenn plis enfòmasyon, gade Help.

Updated: